📰 कोल्हापूरच्या वीरधवल आमतेचा ‘सायकलवरून लडाखपर्यंत प्रवास | Cycling Kolhapur to Ladakh by Veerdhawal Aamte |

३४३७ कि. मी. अंतर, अपघात, थंडी,ऑक्सिजनचा तुटवडा | तरीही जिद्दीने पूर्ण केली मोहीम |

कोल्हापूर/ प्रतिनिधी :

वाहनांच्या गर्दीत हरवलेली सायकल पुन्हा प्रवासाच्या केंद्रस्थानी येते, जेव्हा एखादा युवक जिद्द, चिकाटी आणि आत्मविश्वासाच्या जोरावर सायकलवरून कोल्हापूर ते लडाखपर्यंतचा ३४३७ कि.मी.चा प्रवास पार करतो. कोल्हापूरच्या वीरधवल शरद आमते याने नुकतीच ही धाडसी सफर यशस्वीपणे पूर्ण केली आहे. २९ वर्षीय वीरधवल हे सध्या ‘वीणा वर्ल्ड’ या आघाडीच्या पर्यटन संस्थेत टूर मॅनेजर म्हणून कार्यरत आहेत. खेळाडूवृत्ती आणि साहसप्रियतेमुळेच त्याने सायकलवरून लडाख गाठण्याचा निर्धार केला. विशेष म्हणजे २०११ मध्ये झालेल्या अपघातात त्याच्या पाठीला गंभीर इजा झाली होती. दोन वर्षं अंथरुणाला खिळलेला वीरधवल, तब्बल सहा वर्षांच्या पुनर्वसनानंतर पुन्हा तंदुरुस्त झाला.

६ जून रोजी कोल्हापुरातून सुरुवात कोल्हापूर, सातारा, पुणे, नाशिक, धुळे, इंदूर, आग्रा, दिल्ली, अंबाला, चंदीगड, मनाली, आणि लडाख असा प्रवास करत वीरधवलने २ जुलै २०२५ रोजी हे आव्हान पूर्ण केले. मार्गात बारालाचा पास, लाचुंगला पास, नकीला पास, उमलिंग पास यांसारखे अतिदुर्गम घाट पार करताना अनेक अडचणींचा सामना करावा लागला. दोनवेळा अपघात, एकदा हॉस्पिटलमध्ये दाखल मध्यप्रदेशात जेवणासाठी हॉटेलमध्ये प्रवेश नाकारला गेला. महामार्गावर जीवघेण्या वाहतुकीत दोन वेळा अपघात झाले. साताऱ्याजवळ सायकल नादुरुस्त झाली. सुदैवाने तेथील मेकॅनिकने मदत केली. लडाखमध्ये उंचीमुळे ऑक्सिजनच्या कमतरतेचा सामना करत असताना वीरधवलची तब्येत बिघडली. काही वेळासाठी शुद्ध हरपल्याने त्याला लष्करी हॉस्पिटलमध्ये दाखल करण्यात आले.

वीरधवल आमते - कोल्हापूरचा सायकलवीर ज्याने लडाख गाठलं

सायकलचा फारसा सराव नव्हता, तरीही जिद्द पुरेशी होती या मोहीमेपूर्वी वीरधवलचा नियमित सायकलिंग सराव नव्हता. तरीही दिवसाला १२० किमी अंतर पार करत, थंडी, थकवा आणि शारीरिक वेदना झेलत त्याने प्रवास पूर्ण केला. या मोहिमेसाठी त्याचा सुमारे २.२५ लाख रुपये खर्च झाला.

पुढचं स्वप्न – रशिया ते पोर्तुगाल, १९ हजार किमीचा सायकल प्रवास भारतभर प्रवास केलेल्या वीरधवलने आता रशिया ते पोर्तुगाल असा जगातील सर्वात लांब सायकल प्रवास करण्याची तयारी सुरू केली आहे. वेगवेगळ्या टाईम झोनमध्ये होणारा हा सायकल प्रवास म्हणजे आणखी एक मोठं धाडस ठरणार आहे.

🗣 “सायकलवरून प्रवास करताना प्रत्येक दिवशी नव्या आव्हानांचा सामना करावा लागतो. पण या अनुभवांमुळेच जीवन अधिक समृद्ध होतं,” असं मत वीरधवलने ‘Media Power Live’ शी बोलताना व्यक्त केलं. Media Power Live च्या वतीने वीरधवल आमते यांना पुढील मोहिमेसाठी मनःपूर्वक शुभेच्छा!